شرح دورة الإسعافات*****

بإذن الله هنبدأ هنا شرح دورة الاسعافات النظري والعملي شرح مبسط وخفيف كده بحيث يساعدنا على الفهم والاستفادة من الدورة بإذن الله
وهنبدأ مع بعض بعون الله أول موضوع لينا وهو Injection



بس قبل ما نبدأ لازم ناخد بالنا من حاجه مهمة جدا وهي أنك هتدي الحقنة للمريض عشان تكون سبب في شفائه مش تزيد ألمه وبلاءه وتعدي نفسك أنت كمان فعشان كده في حاجات ضرورية لازم نهتم بيها ومنكسلش عنها زي ما كتيييير من الناس بتعمل وياريت نظرة الإحباط وأني مش أنا اللي هغير الكون دي نشيلها من دماغنا ونمشي في الصح وملناش دعوه بغيرنا اللي بيمشوا غلط ومن الحاجات دي:
- غسل اليدين قبل وبعد الحقن
- التأكد من صلاحية الدواء اللي هتحقنه وميكونش متعكر ولو شكيت فيه يبقى بلاشه أحسن
- متستخدمش سرنجة مستعملة قبل كده حتى لو كانت لنفس الشخص
- تدي الحقنة في اضاءة كويسه مش تروح تدور على حتة ضلمة وتديهاله فيها
-متخلطش أكتر من دواء مع بعض إلا لو الطبيب هو اللي نصح بكده
- متلمسش سن الحقنة بأيدك أو حتى تحاول تعقمها لأنها بتكون متعقمة جاهزة
- متسيبش سن الحقنة مكشوف لفترة طويلة ولو اضطريت لكده يبقى لازم تغطيها لغاية ما ييجي ميعاد اعطائها
- قبل ما تدي الحقنة لازم تتأكد ان مفيش هواء فيها بأنك بتخبط على جنب الحقنة بظهر صابعك براحه كده وتضغط وتطلع الهواء ولو معرفتش تطلعه اسحب لورا شوية هواء واضغط تاني هيطلع بإذن الله
- بعد ما تدي الحقنة وده مهم جدا لازم تغطي السن بتاعها وترمي كل جزء في المكان المحدد ليه زي المشرف هيقوللك في المستشفى بإذن الله

ونبدأ بأه في كيفية اعطاء الحقن وأنواعها:
تحضير السـرنجـة :
- اختيار حجم مناسب لكمية الدواء ( سرنجة 3سم لدواء حجمه 2سم ... الخ ) .
- تنزع من الغلاف ويراعِ عدم ملامسة الجزء الذى يثبت به الإبرة .
تثبت الإبرة جيدًا وبقوة ( حتى لا يتسرب منها الدواء عند بدء الزرق ) لا تنزع الغطاء الواقى للإبرة .
العبـوة الـدوائيـة :
يوجد أشكال متنوعة للعبوة الدوائية منها:
- خاص بدواء على شكل سائل ويحفظ هذا السائل فى أنبوب زجاجى (أمبول) الجزء المقعر من الأنبوب به شريط ملون دائرى يدل على قابلية كسر الأنبوب بالأصابع دون احتياج للمنشار الصغير. عدم وجود هذا الشريط الدال الملون معناه الاحتياج لمنشار ضرورى لكسر الأنبوب ، ويتم ذلك بنشر الزجاج من المنطقة المقعرة لإحداث منطقة رقيقة صغيرة في الزجاج حتى يسهل تكملة الكسر بأطراف الأصابع ، النشر الكامل للزجاج قد يؤدى إلى إصابة الأصابع بجروح وقد تترسب بعض الشظايا داخل السائل.
- خاص بنوع من العلاج على هيئة مسحوق يتطلب أن يذوب أولا فى سائل خاص به ، ودائما يتواجد المسحوق فى زجاجة صغيرة فوهتها محكمة الإغلاق بسدادة مطاطية ، ولذلك يجب حقن أو زرق السائل أولا من خلال السدادة بواسطة السرنجة والإبرة ليتكون محلول جاهز للحقن .
- خاص بسائلين فى عبوتين ويجب خلطهما معًا قبل الحقن .

الخطـوات :

سائل موجود فى أنبوب واحد ( أمبول ) أو فى أنبوبتين

1 . ابدأ بخطوات تحضير السرنجة ( لا تنس المبادئ العامة ) .
2 . قم بكسر الأنبوب الزجاجى كما تم توضيحه من قبل .
3 . انزع الغطاء الواقى للإبرة ، لا تلمس الإبرة أبدا ، ثم ادفع بذراع الحقن لداخل اسطوانة السرنجة لأقصى مدى .
4 . توجيه طرف الإبرة ، دون أن تلامس الأصابع أو الأنبوب من الخارج ، إلى داخل فوهة الأنبوب ( أمبول ) .
5 . ابدأ بشفط السائل حتى أخره وذلك بسحب الذراع للخارج ، ثم ارفع السرنجة ليكون طرف الإبرة لأعلى ، قم بطرد الهواء إن وجد ، وذلك بدفع الذراع برفق شديد لداخل اسطوانة السرنجة . كرر نفس العملية لشفط السائل الأخر إذا كان العقار مكون من أنبوبتين بنفس السرنجة . لا ضرر من تواجد بعض الفقاقيع القليلة .

مسحوق وسائل لعمل محلول
- كرر نفس الخطوات من 1 – 5.
- قم بوخز الغطاء المطاطى وأحقن السائل بداخل الزجاجة الصغيرة ، وامسك بالسرنجة بين صابعين السبابة والوسطى واسند الزجاجة من اسفل بالإبهام ، هز الزجاجة برفق حتى يتم إذابة المحول تمامًا .
- اسحب المحلول وقم بطرد الهواء

أول نوع IM




وده بيكون في 3 أماكن أو 4:
1- Gluteus Muscle
Deltoid Muscle -2
Triceps Muscle -3
Vastus Lateralis Muscle -4
أولا Gluteus Muscle
بندي الحقنة في Upper Lateral Quadrant يعني ايه؟؟؟؟
يعني بندي الحقنة في المربع العلوي الخارجي من المقعدة ليه؟؟؟؟ علشان نبعد عن Sciatic Nerve لأن لو دخلنا في Nerve هتحصل حاجه اسمها Sciatica وده لو حصل هتلاقي رجل المريض اتحركت لوحدها بسرعة وهو هيصوت أكيد يعني لأنه هيشعر بألم فظيع في الرجل من الخلف



وفي كمان طريقة تحدد بيها مكان الحقن وهسيبك تعرفها من الصورة دي






طيب هنعمل ايه بأه بعد تحديد المكان هنجيب اي قطنة أو شاش وكحول ونطهر مكان الحقن ونستنى 30 ثانية لغاية الكحول ما يتطاير وبعد كده ادخل بالحقنة بزاوية قائمة 90 درجة على الجلد بسن الإبرة كلها وده بيكون حسب حالة المريض لو Thin ممكن تاخد جزء Fleshy بين أصبعين من ايدك وتدخل برده عمودي فيه أما لو Fat هتضغط على الجزء اللي هتحقن فيه وتدخل برده بزاويه قايمة تحت صباعك بالظبط علشان تتأكد أن الحقن في Muscle مش sub cutaneuos tissue وفي كمان فايدة هسيبك تعرفها من الصورة اللي جاية دي






وبعد كده تسحب شويه المكبس حاجه بسيطه بس وتشوف هل في Blood وللا مفيش لو مفيش هتدي الحقنة ولو في هتطلع لبره حاجه بسيطة وتحقن الدواء وهتدي الحقنة ببطء وبعد كده هتخرج تسحب الحقنة وتطهر مكانها بقطنة فيها كحول وتطلب من المريض تدليك مكان الحقن
لكن لو ظهر دم يبقى ميدلكش يضغط عليها أفضل



وده فيديو جميييييييييييل جدا



ثانيا Deltoid
ودي بتستخدم في التطعيمات وبتكون بنفس الخطوات ومكان الحقن كما بالصورة








وده فيديو يوضح طريقة الحقن



ثالثا Triceps
ودي بنستخدمها أكتر في حقن التيتانوس لكن بنخاف فيها من Radial Nerve اللي بيعدي في Spiral groove of humerus علشان كده بندي الحقنة في النص التحتاني من الذراع من الخلف وبمسك جزء من العضلة علشان أحدد هدخل قد ايه وبدخل بزاوية مايله 45 درجة



رابعاً Vastus Lateralis
بتكون عادة في الأطفال تحت سن 10 سنوات لكن مبنستخدمهاش لأن كله بياخد في Gluteus





وده فيديو يوضح شوية



وبكده خلصنا حقن IM وبإذن الله نكمل حقن IV وبقية الأنواع
مستني آراءكم وهل في استفادة علشان نكمل وللا منوجعش دماغنا على الفاضي
شكرا جزيلا لكم ونفعكم الله بكل ما نقدمه لحضراتكم

نيجي بأه لحقن IV

طبعا الحقن في الوريد بيتميز ان له Rapid onset of Action
فمهم جدا في Emergency
ممكن أدي في أي وريد في الجسم ولكن أوردة اليد والذراع Most Common




طبعا الخطوات هتكون كالتالي :
1- هتطلب من العيان انه يكشف دراعه وشوف الوريد اللي هتدي فيه وتربط فوقيه بشوية بأي رباط وتخلي مستوى الذراع لأسفل عشان الوريد يظهر ويبقي واضح وحس الوريد بايدك

2- بعد كده طهر مكان الحقن بقطنه وكحول ومتلمسش تاني مكان الحقن بعد تطهيره
3- قم بسحب الجلد في المنطقة تحت الوريد إلى أسفل لتثبيت الوريد
4- هتدخل بزاوية 45 درجه وأنت بتدخل الإبرة هتحس بمقاومة الجلد لغاية ما تنتهي المقاومة يبقى أنت في الوريد ودي بتيجي بالممارسة وعشان تتاكد انك في الوريد تسحب هتلاقي فيه دم في السرنجه تعرف انك كده صح في الوريد وتشيل الضغط أو الرباط اللي انت رابطه وبعد كده تضغط المكبس وتحقن الدواء




5- متدخلش الحقنه للآخر لانك كده ممكن تخرم الوريد من الناحيه التانيه وتعمل مشكله للمريض

6- لو دخلت وحسيت انك مدخلتش في الوريد متطلعش الابره حاول تدور علي الوريد بالراحه لانك غالبا هتكون قريب جدا منه لكن متحركش الإبرة كتير علشان متسببش مشاكل للمريض

7- بعد اما تدي الحقنه حط قطنه ياريت تكون من غير كحول (علشان متعملش فازوديلاتيشن وتجيب دم أكتر) علي سن الابره واسحب الابره وخلي العيان يحط ايده شوية على الحقنه ومتدلكش مكان الحقن أبدا عكس IM

- ممكن بدل الرباط تستخدم جهاز الضغط او تخلي حد يمسك دراع المريض مثلا

- اتجاه الحقن في الوريد يكون في اتجاه سريان الدم للقلب

- بعض الأدوية زي الكالسيوم بتحتاج حقن تدريجي ممكن توصل ل 20 دقيقه لان لو اتاخدن مره واحده تعمل Cardiac Arrest

- طبعا لو لقيت فيه Oedema حصلت في مكان الحقن يبقي انت كده حقنت بره الوريد وتخلي العيان يعمل كمادات بارده في الاول وبعد كده ميه دافيه 3 مرات من 10 : 15 دقيقه

- الحقن يكون فيه وريد كبير خاصه في كبار السن لأن أوردة اليد عندهم بتكون متليفة ورفيعة فالأفضل أنك تبدأ في أوردة الذراع والأوردة الكبيرة

- سن الإبره بيكون مفتوح لفوق

وده فيديو للتوضيح

نيجي بأه لحقن الأنسولين



طبعا حقن الانسولين بتتاخد في البطن حوالين Umblicus



وممكن في الدراع أو في الفخذ



وعاده العيان بيمشي بطريقه Circular عشان ميديش كل مره في نفس المكان

الحقن بيكون Subcutaneous ومنطقه فيها دهون لسهوله الامتصاص

- تتاكد ان الانسلوين رايق وعديم اللون
-قم بتنظيف رأس الزجاجة بقطنة وكحول
-قم بسحب كمية هواء داخل سرنجة الأنسولين مساوية لكمية الدواء التي ستسحبها من الزجاجة
-ضع الإبرة داخل الغطاء المطاطي للزجاجة واحقن الهواء ثم اقلب الزجاجة واسحب الدواء
-إذا وجدت فقاعات هواء داخل السرنجة فقم بالطرق الخفيف على السرنجة لتتصاعد الفقاعات وقم بالضغط على المكبس قليلا لتتخلص منها



-أخرج السن من الزجاجة وأنت الان جاهز لإعطاء الحقنة
-أمسك جزء من الجلد في مكان الحقن بين أصابعك وأدخل لإبرة عمودية حتى تصل تحت الجلد



الحقن تدريجي وبعدين اسحب السرنجه

- مينفعش تحقن الانسولين في منطقه مكلكعه او فيها Infection

- مينفعش تدي مرتين في نفس المكان الا بعد اسبوعين عشان كده بتدي بطريقه Circular زي ما وضحنا فوق



وزي ما اتعودنا شوية فيديوهات بسيط كده للتوضيح ده غير اللي في الأسطوانة اللي هتاخدوها بإذن الله





-------------------------------------------------------------------------------

كده فاضلنا حاجه واحده بسيطه كده في الحقن وهي الحقن في الجلد Intradermal

ودي بتكون في الجلد نفسه وبتكون عاده في التطعيمات وبيديها متخصصين لان اي غلط هتخلي العيان يتعدي بالمرض اللي بياخد التطعيم عشانه ويتم استخدام إبرة خاصة للحقن



طيب واختبار الحساسية؟؟ بنعمله ازااااي؟؟

في نص الدراع كده نص ملي من الدواء اللي عاوز اعمله اختبار



واستنى 10 دقائق 10 دقايق لو الجلد احمر في المنطقه دي والعيان بدأ يهرش يبقي عنده حساسيه من الدوا ده يبقى مديهوش الدواء
ويفضل استخدام إبرة الأنسولين لأن سنها صغير وهتساعدك في الاختبار

وآدي الفيديو أهه





وفي ختام الحقن ليكوا عندي شوية فيديوهات كده فوق البيعه زي مراجعة سريعه
اتفضلوا





انتظروا Stitch قريباً بإذن الله
والله الموفق

الله عليك يا دكتور على فكرة الى يقراة هنا مش لازم يجى الدورة ههههههه

هههه
طب ابقى اعملها كدة
(اتوصى بيه يا أبيض فى التصحيح:D:D)

لأ أنا بحب محمد جدا والله
لأنه شخصية محترمة وملتزم قدر المستطاع
يارب لدورة تكون مفيدة لكل الناس ومفيش حد يكون زعل مننا لأي سبب

لية كدة يا ابو سمرة دا انت حبيبى

السلام عليكم ورحمة الله وبركاته
تمام كدة
نزله يادكتر اظن الناس بتشوفه وكمان طريقته حلوة
كمان لسة فيه ناس ممكن تشوفه قبل الامتحان ..... او لو حبين يراجعوا بعد ماخلصوا الدورة او حتى اللى لسة هيبدأوا
جزاكم الله عنه خير

بجد جزاك الله كل خير ربنا يوفقك فى حياتك ان شاء الله انا بجد استفدت

أهلا بيكى د.وفاء

(متنسيش الحلاوة بقى:D:D )

كفاية الدعوتين دول والله

الأبيض بجد هيتشجع أنه يكممل
جزاكم الله خيراً

يلا يا عم
(روح ذاكر بقى هههههه)

ايه الجمال ده ياابيض جزاك الله خيرا
استمرررررررررررررررررررررررررررررررررررررررررررررررر

هههههه
ميييييين

وفاء كتب:

بجد جزاك الله كل خير ربنا يوفقك فى حياتك ان شاء الله انا بجد استفدت

شكرا جزيلا على الدعوة الجميلة دي
ويارب الدورة تكون عجبت حضرتك وتكوني استفدتي بكل كلمة
كملي معانا استفادة بأه بشرح الStitch بإذن الله

إسلام عمران كتب:

ايه الجمال ده ياابيض جزاك الله خيرا
استمرررررررررررررررررررررررررررررررررررررررررررررررر

شكرا يا سلم
بإذن الله مستمرررررررر

السلام عليكم ورحمة الله وبركاته

انتم بجد بتشوفوا الحاجات دى فى المستشفى
بجد حرام عليكم
انا اترعبت من الصور سبحان الله
صاحبها بيستحمل ازاى
ما شاء الله عليكم قلبكم حديد
انا دخلت الموضوع ده غلط
ربنا يقويكم

السلام عليكم ورحمة الله وبركاته

من اولها ولا ايه يارباب دا انا بقول انتى اللى هتنصفينى فى المجموعة

استنى عليا بس واما ننزل المستشفى اخليكى تيجى تتفسحى هنا كل يوم........

ما تخفيش ياستى الحالات ببتبقى اسهل من كدة اقولك ليه .......... اصل بتيجى من غير السكينة

عايزايكى بقى 3 مرات بعد الاكل كل يوم لحد مانروح المستشفى تتدخلى هنا ولو خلصتى عيدى الروشته ...... قصدى عيدى الموضوع من الاول


استمر يادكتر متابعين ان شاء الله.......... جزاكم الله خيرا

السلام عليكم

احم احم

(غلط كمان)

وكان فى محاضرة نظرى انبارح منحضرتش

يوم الاحد فى شرح العملى ان شاء الله من 9 الى 3 العصر

السلاام عليكم
(جيب الكشف يا أبيض)

السلام عليكم

ان شاء الله طبعا العملى كله هينحضر من غير غياب خالص

(معلش يا أبيض الغياب وراك وراك حتى فى مواضيعك هههههه)

اكيد ان شاء الله مفيش غياب
وبجد تكون بزعلة كبيييييرة على غياب الأبكساويين بالذات

ان شاء الله مفيش زعل :d:d = مفيش غياب

Rabab كتب:

السلام عليكم ورحمة الله وبركاته

انتم بجد بتشوفوا الحاجات دى فى المستشفى
بجد حرام عليكم
انا اترعبت من الصور سبحان الله
صاحبها بيستحمل ازاى
ما شاء الله عليكم قلبكم حديد
انا دخلت الموضوع ده غلط
ربنا يقويكم

طيب الحمد لله أنها آتت ثمارها
انا دورت على أفظع الصور ووضعتها علشان تاخدوا على كده وبالنسبة للغياب أنا زعلت لما وجدت أن حضرتك غايبه عن المحاضرة لأن ميصحش خالص دكتورة معانا على المنتدى والمفروض بتشوف المواعيد ومتحضرش إلا إذا طنشتنا خالص بأه
وأرجوا الكلام ده ميتكررش بإذن الله
لكن أنا عاوز رأي حضرتك في الشرح نفسه بلاش الصور

السلام عليكم ورحمة الله وبركاته
احنا انكشفنا وخلاص
ماشى ان شاء الله مفيش غياب تانى
والله انا كان فى نيتى احضر العملى بس
بس خلاص ان شاء الله احضر كل المحاضرات
دا كفايه ان ايه هى المشرفه بتعتى
وبجد شرح متميز يا دكتر
واكيد بتتعب فيه
ربنا يقويك ان شاء الله
ومتابعه